பொங்கல் பண்டிகை தென்னிந்தியாவில் மட்டுமின்றி, உலகம் முழுவதிலும் உள்ள தமிழர்களால் வெகு சிறப்பாகக் கொண்டாடப்படும் பண்டிகையாகும். இந்தியாவில் பல்வேறு மாநிலங்களிலும் பல்வேறு பெயர்களில் பொங்கல் பண்டிகை கொண்டாடப்படுகிறது.
வடஇந்தியாவில் இது அறுவடை திருநாள் என்ற பெயரிலும், சங்கராந்தி என்ற கொண்டாடப்படுகிறது. தை மாதப் பிறப்பு அவரவரின் கலாச்சாரங்களை கொண்டாடும் பாரம்பரிய திருநாளாகவும் கொண்டாடப்படுகிறது.
ஜோதிட ரீதியாகவும் தை மாதப்பிறப்பு முக்கியத்துவம் வாய்ந்த நாளாக கருதப்படுகிறது. சூரிய பகவான் வடநோக்கு பயணிக்க துவங்கும் காலம் இதுவாகும். சூரிய பகவான், தனுசு ராசியில் இருந்து மகர ராசிக்குள் நுழையும் நாளையே மகர சங்கராந்தியாக நாம் கொண்டாடுகிறோம். இந்த நாளில் வானில் மகர நட்சத்திரம் தோன்றுவதும் தனிச்சிறப்பானதாகும்.
தேவர்களின் உத்தராயண காலம் துவங்கும் காலமும் தை மாதம் முதல் நாளில் தான். இந்த நாளில் எந்த நேரத்தில் பொங்கல் வைத்து, என்ன படைத்து வழிபட்டால் ஆண்ட முழுவதும் செல்வம் பெருகும் என்பதை தெரிந்து கொள்ளலாம்.
பொங்கல் பண்டிகை :
ஒவ்வொரு தமிழ் மாதத்தின் முதல் நாளும் முக்கிய நாளாக கருதி கொண்டாடுவது தமிழர்களின் மரபு. காலப்போக்கில் இந்த வழக்கம் மறைந்து தற்போது சித்திரை, ஆடி, கார்த்திகை, தை உள்ளிட்ட மாதங்களின் முதல் நாள் முக்கிய விழா நாளாகவும், விரத நாளாகவும் கொண்டாடுகிறோம்.
இவற்றுள் சித்திரை முதல் நாளை தமிழ் புத்தாண்டாகவும், தை முதல் நாளை பொங்கல் பண்டிகையாகவும் கொண்டாடுகிறோம். தமிழர்களின் மிக முக்கியமான பாரம்பரிய பண்டிகையாக உலகம் முழுவதும் கொண்டாடப்படுவது பொங்கல் திருநாள்.
குளிர்காலம் முடிந்து, வசந்த காலத்தை வரவேற்கும் விதமாகவும், உழவுக்கு முக்கிய ஆதாரமாக விளங்கும் சூரியன், மாடு உள்ளிட்டவற்றிற்கு நன்றி செலுத்தி, வழிபடும் பண்டிகையாகவும் பொங்கல் பண்டிகை கொண்டாடப்படுகிறது.
பொங்கல் 2024 தேதி :
போகி துவங்கி, காணும் பொங்கல் வரை நான்கு நாள் கொண்டாட்டமாக பொங்கல் திருநாள் கொண்டாடப்படுகிறது. புதிய பானையில், புதிய அரிசியில் பொங்கி வரும் பொங்கலை போல் நம்முடைய வாழ்விலும் ஆனந்தமும், செல்வ வளமும் நிறைந்து பொங்கி வர வேண்டும் என்ற நோக்கத்துடனேயே பொங்கல் பண்டிகை கொண்டாடப்படுகிறது. இதனால் ஆண்டு முழுவதும் வாழ்வு செழிக்கும் என்பது நம்பிக்கை.
2024ம் ஆண்டில் ஜனவரி 14ம் தேதி ஞாயிற்றுக்கிழமை போகிப் பண்டிகையும், ஜனவரி 15ம் தேதி திங்கட்கிழமை தைப்பொங்கலும், ஜனவரி 16ம் தேதி செவ்வாய்கிழமை மாட்டுப்பொங்கலும், ஜனவரி 17ம் தேதி காணும் பொங்கலும் கொண்டாடப்பட உள்ளது.
2024 பொங்கல் வைக்க நல்ல நேரம் :
பொங்கல் வைக்கும் போது நல்ல நேரம் பார்த்து வைப்பது நம்முடைய வழக்கம். ஒருவேளை அந்த நேரத்தில் பொங்கல் வைக்க முடியாதவர்கள், ராகு காலம், எமகண்டம் தவிர்த்து மற்ற நேரங்களில் பொங்கல் வைக்கலாம். இந்த ஆண்டு பொங்கல் பண்டிகை திங்கட்கிழமை வருகிறது. அதோடு அன்றைய தினம் கரிநாளும் கூட. அன்றைய தினம் காலை 07.30 மணி முதல் 9 மணி வரை ராகு காலமும், 10.30 முதல் 12 வரை எமகண்டமும் உள்ளது. இதனால் இந்த நேரங்களை தவிர்த்து பொங்கல் வைக்கலாம்.
ஜனவரி 15 பொங்கல் வைக்க நல்ல நேரம் :
காலை 06.30 முதல் 07.30 வரை
அல்லது
காலை 09.30 முதல் 10.30 வரை
ஜனவரி 16 மாட்டுப் பொங்கல் வைக்க நல்ல நேரம் :
காலை 11 மணி முதல் பகல் 01 மணி வரை
பொங்கல் வைக்கும் முறை :
புதிய மண்பானையில் மஞ்சள், குங்குமம் வைத்து, அதன் வாய் பகுதியில் இஞ்சி, மஞ்சள் கொத்துக்களையும், பூக்களையும் சுற்றி வைத்து அடுப்பில் வைக்க வேண்டும். வாசலில் அடுப்பு வைத்து, சூரியனுக்கு முன் பொங்கல் வைப்பது சிறப்பானது. முடியாதவர்கள் வீட்டிற்குள் வைக்கலாம்.
பால், தண்ணீர் சேர்த்து அடுப்பில் வைத்து, பொங்கல் பொங்கி வரும் போது "பொங்கலோ...பொங்கல்" என சத்தமிட வேண்டும். கிராமப்புறங்களில் குலவையிடுவதும், சங்கொலி எழுப்புவதும் வழக்கம். ஊறவைத்த அரிசி, பருப்பை அடுப்பில் சேர்த்து கிளற வேண்டும். அரிசியும், பருப்பும் வெந்த பிறகு பொடித்து வைத்த வெல்லம், ஏலக்காய், முந்திரி, நெய் சேர்த்து இறக்க வேண்டும்.
பூஜைக்கு வைக்க வேண்டிய பொருட்கள் :
பொங்கல் வைத்த பிறகு பூஜை செய்யும் போது சர்க்கரை பொங்கல், கரும்பு ஆகியவற்றுடன் கல் உப்பு, துவரம் பருப்பு, வெல்லம், பச்சரிசி அல்லது நெல் போன்றவற்றையும் வாங்கி வைத்து வழிபடலாம். இவை மகாலட்சுமி லட்சுமி வாசம் செய்யும் பொருட்களாக கருதப்படுவதால் இவறக்றை வைத்து பூஜை செய்தால் வீட்டில் செல்வம் பெருகும் என்பது ஐதீகம். பொங்கல் வைத்த பிறகு வாழை இலை பரப்பி சர்க்கரை பொங்கல், பாயசம், வடை, கரும்பு, பலவிதமான பழங்கள் வைத்து நல்ல நேரம் முடிவதற்குள் பூஜை செய்வது சிறப்பானதாகும்.
