பஞ்சபூதங்களும் இறைவனுக்குள் அடக்கம் என்பதை உணர்த்து நாளாக தைப்பூசம் விளங்குகிறது. அதனால் இந்த நாளில் சிவாலயங்களில் சிறப்பு பூஜைகள் நடத்தப்படும். ஜோதிட ரீதியாக பூசம் நட்சத்திரம் என்பது சனி பகவானின் ஆதிக்கம் நிறைந்த நட்சத்திரமாகும்.
இது தை மாத பெளர்ணமி நாளுடன் இணைந்து வருவது கூடுதல் சிறப்பு பெறுகிறது. முருகப் பெருமான் சிவ-சக்தி ஐக்கியமான ரூபமாக விளங்குவதால் தைப்பூசம் முருகனுக்குரிய வழிபாட்டு நாளாயிற்று.
தைப்பூச பெருவிழா :
முருகப் பெருமானுக்குரிய மிக முக்கியமான விரத நாட்களில் ஒன்று தைப்பூசம். தைப்பூசப் பெருவிழா பழனி தலத்திற்குரிய விழாவாக கருதப்பட்டாலும், உலகம் முழுவதிலும் உள்ள முருகன் கோவில்களிலும் தைப்பூச திருவிழா கோலாகலமாகக் கொண்டாடப்படுவது வழக்கம்.
ஏராளமான பக்தர்கள் பால்குடம், காவடி உள்ளிட்டவற்றை ஏந்தி வந்து முருகனை இந்த நாளில் வழிபடுவார்கள். தை மாதத்தில் வரும் பெளர்ணமியுடன், பூசம் நட்சத்திரம் இணையும் நாளை தைப்பூச நாளாக கொண்டாடுகிறோம். தைப்பூசம் எதற்காக கொண்டாடப்படுகிறது என்பதற்கு பல புராண கதைகள் சொல்லப்படுவது உண்டு.
தைப்பூசம் தோன்றிய வரலாறு :
முனிவர்களுக்கு பலவிதமான துன்பங்களை கொடுத்து வந்த தாரகாசுரன் என்ற அசுரனை முருகப் பெருமான் இந்த நாளில் தான் வதம் செய்தார். முருகப் பெருமான் வள்ளியை திருமணம் செய்து கொண்டதும், அன்னை பராசக்தியின் மொத்த சக்திகளையும் உள்ளடக்கிய சக்திவேலை வாங்கியதும் இதே நாளில் தான்.
முருகப் பெருமானுக்கு தான் அளித்த சாபத்தை நீக்குவதற்காக அவர் முன் தோன்றி பார்வதி தேவி காட்சி கொடுத்ததும் இதே தைப்பூச திருநாள் தான் என புராணங்கள் சொல்கின்றன. ஞான பண்டிதனான முருகப் பெருமான், தனது தந்தை ஈசனுக்கே பிரணவ மந்திரத்திற்கு பொருளை உபதேசம் செய்ததும் இதே நாளில் தான்.
வள்ளியை திருமணம் செய்ததால் ஊடல் கொண்ட தெய்வாணையை சமாதானம் செய்து வள்ளி-தெய்வாணை சமேதராக முருகப் பெருமான் காட்சி தந்ததும் தைப்பூச நாளில் தான் என சொல்லப்படுகிறது.
சிவனுக்குரிய நாளான தைப்பூசம் :
தைப்பூச திருநாள் சிவன் மற்றும் பார்வதி தேவியுடனும் தொடர்புடைய நாளாக கருதப்படுகிறது. மார்கழி திருவாதிரையில் சிதம்பரத்தில் சிவ பெருமான் தனித்து நடனம் ஆடியதை கண்ட பார்வதிக்கு தானும் இதே போல் ஆனந்த தாண்டவம் நிகழ்த்த வேண்டும் என ஆசைப்பட்டு, பராசக்தி தனியாக ஆனந்த தாண்டவம் ஆடியது தைப்பூச நாளில் தான்.
சிதம்பரத்தில் சிவ - பார்வதி இருவரும் இணைந்து ஆனந்த நடனம் ஆடியதும் தைப்பூச திருநாளில் தான். முருகப் பெருமான் அகத்தியருக்கு தமிழை கற்றுக் கொடுத்ததும் இதே தைப்பூச திருநாளில் தான் என சொல்லப்படுகிறது. தைப்பூச நாளில் தான் நீர் உருவானதாகவும், அதில் இருந்து உலக உயிர்கள் உருவானதாகவும் சொல்லப்படுகிறது.
தைப்பூச விரத பலன்கள் :
இத்தகைய சிறப்பு வாய்ந்த தைப்பூச திருநாளில் தொட்ட காரியங்கள் அனைத்தும் வெற்றி அடையும். பிரிந்த தம்பதிகள் ஒன்று சேர்வார்கள். குழந்தை வரம், திருமணம், ஆயுள், குடும்ப ஒற்றுமை ஆகியவை கிடைப்பதுடன், தைப்பூசத்தன்று முருகனுக்கு நடக்கும் பூஜை, அபிஷேகங்களை கண்டால் சகல பாவங்களும் நீங்கும்.
தோஷங்கள் நீங்கும், நினைத்த காரியங்கள் கைகூடும். தைப்பூச விரதம் இருக்கும் முருக பக்தர்கள் மார்கழி மாதத்திலேயே துவங்கி தொடர்ந்து 48 நாட்கள் இந்த விரதத்தை இருப்பார்கள். லட்சக்கணக்கான பக்தர்கள் பழனிக்கு காவடி ஏந்தி, பாதயாத்திரையாக வந்து நேர்த்திக்கடன் செலுத்தும் வழக்கமும் உண்டு.
தைப்பூசம் 2024 தேதி, நேரம் :
அளவில்லாத பலன்களை அள்ளித்தரும், பல சிறப்புகளைக் கொண்ட தைப்பூசத் திருநாள் 2024ம் ஆண்டில் ஜனவரி 25ம் தேதி வருகிறது. அதுவும் குரு பகவானுக்குரிய வியாழக்கிழமையில் வருவதால் இந்த ஆண்டு தைப்பூசம் கூடுதல் சிறப்பானதாக கருதப்படுகிறது.
ஜனவரி 24ம் தேதி இரவு 10.44 மணி துவங்கி, ஜனவரி 25ம் தேதி இரவு 11.56 வரை பெளர்ணமி திதி உள்ளது. அதே சமயம் ஜனவரி 25ம் தேதி காலை 09.14 மணிக்கு பிறகே பூசம் நட்சத்திரம் துவங்குகிறது.
ஜனவரி 26ம் தேதி காலை 11.07 வரை பூசம் நட்சத்திரம் உள்ளது. இதனால் ஜனவரி 25ம் தேதியே தைப்பூச வழிபாட்டினை மேற்கொள்ள வேண்டும். இந்த நாளில் முருகப் பெருமானை மட்டுமின்றி பார்வதி தேவியையும், சிவ பெருமானையும், குரு பகவானையும் வழிபடுவது அதிக சிறப்பு வாய்ந்ததாகும்.
தைப்பூச விரத முறை :
தைப்பூசத்தன்று அதிகாலையில் எழுந்து நீராடி, வீட்டில் உள்ள முருகப் பெருமான் படத்திற்கு மலர்களால் அலங்கரித்து, விளக்கேற்றி வழிபட வேண்டும். அன்று மூன்று வேளையும் பால், பழங்கள் மட்டும் சாப்பிட்டு விரதம் இருக்க வேண்டும்.
முருகப் பெருமானுக்குரிய கந்தசஷ்டி கவசம், கந்தர் அலங்காரம், கந்தர் அனுபூதி, திருப்புகழ் உள்ளிட்ட பாடல்களை பாராயணம் செய்ய வேண்டும். இது எதுவும் தெரியாதவர்கள் எளிமையாக "ஓம் சரவணபவ" என ஆறெழுத்து மந்திரத்தை சொல்லி முருகனை வழிபட வேண்டும். மாலையில் கோவிலுக்கு சென்று முருகப் பெருமானை தரிசித்த பிறகே விரதத்தை நிறைவு செய்ய வேண்டும்.
