தமிழர்களின் வீரத்தையும், கலாச்சாரத்தையும் போற்றும் விதமான கொண்டாடப்படும் பொங்கல் பண்டிகை அனைத்து தரப்பு மக்களிடமும் அன்பையும், உற்சாகத்தையும், ஒற்றுமையையும் வளர்க்கும் பண்டிகையாக இருந்து வருகிறது.
தமிழர்களின் பாரம்பரிய பண்டிகையாக ஆண்டுதோறும் தை முதல் தேதியில் கொண்டாடப்படுவது வழக்கம். உழவுத் தொழிலுக்கும், அதற்கு உதவியாக இருக்கும் சூரிய பகவானுக்கும், காளை மாடுகளுக்கும் நன்றி தெரிவிக்கும் விதமாக கொண்டாடப்படுவதே பொங்கல் பண்டிகையாகும்.
சூரிய பகவான் தனுசு ராசியில் இருந்து மகர ராசிக்கு மாறும் இந்த நாளை மகர சங்கராந்தி என்றும் மற்ற தென்னிந்திய மாநிலங்களில் கொண்டாடுகிறார்கள். அதே போல் நாட்டின் பல்வேறு மாநிலங்களிலும் பொங்கல் பண்டிகை, அறுவடை திருநாளாக வேறு வேறு பெயர்களின் கொண்டாடப்பட்டு வருகிறது.
பொங்கல் பண்டிகை சிறப்புகள் :
தைப் பொங்கல் திருநாள் நான்கு நாட்கள் பண்டிகையாக கொண்டாடப்படுவது வழக்கம். முதல் நாளான போகியில் பழையவற்றை நீக்கி விட்டு, புதியவற்றையும் நல்ல விஷயங்களையும் வரவேற்கும் நாளாக கொண்டாட வேண்டும்.
இரண்டாம் நாளான தை பொங்கல் அன்று சூரிய பகவானுக்கும், மூன்றாம் நாள் மாட்டுப் பொங்கல் அன்று மாடுகளுக்கும், உழவுத் தொழிலுக்கு பயன்படும் பொருட்கள், நிலம் ஆகியவற்றிற்கு மரியாதையும், நன்றியும் செலுத்தும் நாளாகவும் கொண்டாடப்படுகிறது.
கடைசியாக நான்காவது நாளில் உறவுகளுடன் இணைந்து, அன்பை புதுப்பித்து பெருக செய்யும் நாளாக கானும் பொங்கலையும் கொண்டாடுவது வழக்கம். பல்வேறு பாரம்பரிய விளையாட்டுக்களுடன், வீர விளையாட்டுக்களையும் நடத்தி உற்சாகமாக பொங்கல் திருநாளை கொண்டாடும் வழக்கம் உள்ளது.
சர்க்கரை பொங்கல் வைப்பது ஏன்?
வாழ்க்கை என்பது இனிப்பு, காரம் என அனைத்தும் கலந்தது என்ற தத்துவத்தை உணர்த்தும் விதமாக தைப் பொங்கல் நாளில் சர்க்கரை பொங்கல் மற்றும் வெள்ளை பொங்கல் என இரண்டு விதமான பொங்கல் வைத்து வழிபடுவது நம்முடைய வழக்கம்.
குடும்பத்தில் உள்ள அனைவரும் ஒன்று கூடி, புதிய பானையில் புதிதாக விளைந்த பச்சரிசி, வெல்லம், பருப்பு ஆகியவற்றை சேர்த்து சர்க்கரை பொங்கல் வைத்து, முதலில் சூரிய பகவானுக்கு படைக்க வேண்டும்.
பிறகு வீட்டில் படையல் போட்டு, பொங்கல், பழங்கள் ஆகியவற்றை படைத்து குல தெய்வம் மற்றும் வீட்டில் இருக்கும் தெய்வத்திற்கும் படைத்து வழிபட்ட பிறகே நாம் சாப்பிட வேண்டும்.
சூரிய பொங்கல் :
தைப் பொங்கலை சூரிய பொங்கல் என்றும் குறிப்பிடுகிறோம். சூரிய பகவானின் கதகதப்பான தன்மை மற்றும் ஒளியை குறிக்கும் வகையிலேயே, தைப் பொங்கல் அன்று பால், வெல்லமும் பயன்படுத்தி பொங்கல் வைக்கப்படுகிறது.
அதே போல் விளைச்சல், வீட்டில் செல்வ வளம் ஆகியவை பொங்கி, பெருக வேண்டும் என்பதற்காகவும், மங்கல நிகழ்வுகளால் மகிழ்ச்சி பொங்க வேண்டும் என்பதற்காக தான் தைப் பொங்கல் அன்று பொங்கல் பொங்கி வரும் போது குளவையிட்டும், சங்கநாதம் இசைத்தும் உற்சாகமாக மக்கள், "பொங்கலோ...பொங்கல்" என சத்தமிடுகிறார்கள். அன்பு பெருக வேண்டும் என்பதற்காக தான் அக்கம் பக்கத்து வீடுகளுக்கும் பொங்கல் வைத்து, பரிசுகளை பரிமாறிக் கொள்ளும் பழக்கம் ஏற்பட்டது.
